أحيانا الواحد بيتفحص جوانب شخصيته ،أسلوبه، مظهره، نمط حياته، وبيقارنهم بالبيئة حواليه ، أو بالمتعاملين معه ، وبكدة يضطر يغير أو يحور حاجة أو أكتر مما سبق.
أول تغيير في حياتي كان في الشخصية ودة كان غصب عني ، ناس كبار كانوا بينادولك باسم الدلع مجردا وأحيانا مقرونا ب"ياض يا..." في يوم وبيضة بقيت"دكتور..."والأدهي إنهم يتعدلوا في مجالسهم أول م أعدي عليهم ،تقولشي ظابط بنسر، كنت مضطر أقتل الطفل اللي جوايا عشان الدكتور يعيش .
ثم توالت التنازلات ، حبيبتي اللي بعدت عنها وسبتها تحارب وحدها ضد أهلها وابن عمهااللي عايز يتجوزها بالعافية(رفضوا تكمل بعد الاعدادية وأنا قدمت الدوسيه بتاعها للثانوية في نفس مدرستي ،وابن عمها حرق كتبها وأنا دوخت لحد م جمعتلها كتب من صحابي وحكايات كتير) ، لحد ما في يوم خميس كنت نازل البلد فوجئت إنه يوم زفافها علي ابن عمها .
نسمة رقيقة لذيذة خفيفة الدم ضاعت مني ، كانت أحلي حاجة ف حياتي راحت، علشان ايه؟.
تنازلت عن كرمي الفطري الصعيدي بسبب بعض الزملاء القادمين من بلاد ومدن لا تعترف الا بلغة المصالح وتؤمن بمقولة مفادها"اللي ييجي من الصعايدة فايدة!" وهم لا يدركون أن العلاقات الإنسانية عند الصعيدي أهم وأبقي من السطحية المادية.
تخليت أيضا عن بساطة الملبس والكلاسيك واتجهت للكاجوال والجينز والأديداس والديادورا حتي لا أبدو في صورة الشاب المتزمت ،مع إحساسي الداخلي بالتزمت الشديد.
تخليت أيضا عن رفضي الشديد للأغاني والموسيقي الغربية ، وأصبحت من أشد المعجبين بها بداية من عيلة جاكسون وماريا كاري وويتني هيوستون وجورج مايكل وسيلين ديون مرورا بباكستريت بويز وبويزون وبريتني وبيونسيه وشون بول وانريكي و......هلم جرجر!
في ناس ممكن تفتكر إني ب100 وش ، بس لو كان دة رأيك فيا أرجوك فتش جوة نفسك ، وأنا متأكد إنك ح تلاقي 500 مش 100 ، ساعتها متلومنيش واديني العذر ، لأني مهما اتغير شكلي ، أكيد اللي جوايا هو نفس الطفل الصعيدي البرئ اللي مدخلش جامعة ،اللي لما بيبتسم بيبتسم بجد من غير ما حد يقوله "say cheese" .
