‎
بسم الله الرحمن الرحيم



وصلني تاج صعب جدا من العزيزة lyssandra‏ وكان لازم عليا أقبله مع أني كنت باكره حل الواجبات أيام المدرسة بس قلت في الآخر أهو واجب يفوت ولا حد يموت .



السؤال بيقول:أذكر ستة أسرار لا يعرفها من يقابلك لأول مرة؟




نبدأ الإجابة علي بركة الله





أولا : اللي ح يشوفني أول مرة مش ح يعرف إني مسالم جدا ومش بتاع مشاكل ، حاكم أخوكم عامل زي بتوع المصارعة-مفتول العضلات مشرئب الفلنكات-ودة ممكن يديلك فكرة أني فتوة وبتاع خناقات بس الحقيقة أنا هادي جدا لأقصي الحدود .





ثانيا : اللي ح يقابلني أول مرة مش ح يعرف إني باهوي حاجة اسمها هندسة الكترونيات واتصالات، يعني أخوكم طبيب ومهندس خصوصا في تقنيات الوايرلس ، مرة عملت شكوي لشركة المحمول بسبب مشكلة في الشبكة عندنا ،يوم وكلمني مهندس من الصيانة بيستفسر عن الشكوي ، المهم أخوكم رسم دور المهندس واديتله كل بيانات المحطة العطلانة والأكواد ومكان المشكلة وكمان المفروض يعمله ، المهندس افتكرني زميل وأول ما قلتله أني طبيب مصدقش وحلف ميت يمين إني مهندس زيه.





ثالثا: اللي ح يقابلني أول مرة مش ح يعرف إني لماح أوي وبافهمها وهي طايرة ، يعني باحب أعمل عبيط الأول لحد م أقيم شخصية اللي قدامي بدون م أديله مبرر علشان يغير وشه بالبلدي ، وبكدة أقدر أعرف شخصيته من أول مرة .





رابعا : أول مرة ممكن تفتكرني جد أوي ورسمي جدا بس أنا في الحقيقة مرح جدا جدا وبحب الضحك وأكره التكشيرة وخصوصا تكشيرة الصبح ، نفسي ألاقي واحد يصحي من النوم مبتسم ، بس ساعات بدي العذر للناس علي أساس إن ريحة بقهم مش ولابد.





خامسا : أنا حنون جدا وحساس جدا وأقل حاجة ممكن تزعلني بس باحاول علي قد م أقدر أحتفظ بالشعور دة جوايا من غير ما حد يحس .





سادسا : أنا باحب الحيوانات جدا خصوصا القطط ، ونفسي الناس تفكر إن الحيوانات ليها أرواح وبتحس زينا ، بازعل جدا لما أشوف حيوان بيتألم وأنا مش قادر أعمل حاجة ، الرسول عليه الصلاة والسلام أمرنا بالرفق بالحيوان والعطف عليه لأنه ممكن يكون سبب لدخولك الجنة زي ما القسوة عليه ممكن يكون سبب لدخول النار والعياذ بالله كما ورد بالحديثين الشريفين بقصة الرجل والكلب، والمرأة والهرة .






هييه تم بحمد الله حل أول واجباتي التدوينية بعد معاناة رهيبة من الضغط علي أزرار الموبايل ولغة ال HTML ‎‏ الملعبكة ، باقي إني أعذب قصدي أمرر التاج لحد أعرفه فبما إني جديد والمعارف قليلين فسأمرر التاج لصديقي الجنوبي عمرو بس علشان معظم اللي أعرفهم وصلهم التاج دة وجاوبوا عليه .
‏

مبسوطة يا lyssandra ‎‏ ؟! تدوني كام من عشرة؟